He karere mō Tā Hirini Moko Mead

Hikohiko te uirā, papā te whaitiri ki runga i ngā awa ararau ō Tarawera, ō Te Awa o Te Atua, ō Rangitāiki, o Orini, o Whakatāne. Ka kūtia ka wherahia ngā toka tipua o Te Paepae ō Aotea, ko koe tēnā e Koro Hirini Mokohaerewa Mead.

Kua hinga te toki tangatanga i te rā. Kua takoto te rākau tawatawa ō Awanuiārangi wānanga rau. E te toki hemihemi o Te Rūnanga o Ngāti Awa. E te tauiho tuarae o Te Whare Wānanga o Awanuiārangi. E te poutokomanawa ō Te Reo Irirangi o Te Mānuka Tūtahi. E te pou matapū ō Te Tohu o te ora o Ngāti Awa. E te whakaruruhau o te iwi, o ngā hapū kārangaranga o Ngāti Awa, kua ngū, kua moe ki tuārae o Hinenuitepō.

E te puna whakareia o te kauae runga, o te kauae raro, moe mai rā, takoto mai rā, okioki e.
E nga iwi, e ngā kārangarangatanga huri noa i te motu.

Kua moe te Ariki Awatope Mānuka Tūtahi, te toka tūmoana, ākinga tai, ākinga ngaru tuātea o te ao kōhatu.

Te uri whakaheke o ngā kāwai Rangatira o Ngāti Awa, o Tūhourangi mē Tūwharetoa. Te mātāmua o ngā tamariki o Syndey Montague Mead rāua ko Paranihia Pāpākore (Elsie) Moko. Te mokopuna a Te Mokohaerewa Riini Manuera rāua Moetu Arewhita Nehuahiahi Awa Horomona.

Nā te mate kōrua ko tō makau a June Te Rina (nee Walker) i wehe, ā, kua riro mā te mate kōrua ko te putiputi o Ngāti Porou i tūhono. He aroha pūmau, he aroha e kore e tīneia mō āke tonu atu. Kua mahue mokemoke mai ana tamariki tokotoru a Linda Tuhiwai Smith, a Aroha Pareake me Hinauri. Ko ana mokopuna ēnei e tangi mōteatea atu nei i raro i te kapua pōuri.

Ngā Whakanekeneke

Ka tau te tūpāpaku o tō tatou mōrehu koroua ki tana marae ki Kōkōhīnau, ka takoto ki roto i te tipuna whare Ōruataupare. Hei te tūrei te tuarua o Hune i te 10am, ka tīmata ngā karakia whakamutunga, muri iho, ka tanumia ki te urupā o Kōkōhīnau i waenga i tana rahi o Te Pahipoto nui tonu. Nā te whānau.

Tuwhakairiora O’Brien
Tumuaki  

Dr Jim Mather
Chairman

The Hon. Justice Layne Harvery
Chairperson

Kay Charles
Chairperson  

Pānui motuhake